Wëllkomm op mimamu.lu

Wat ass mimamu ?

mimamu...

                 ...ass eng Initiativ vum SCRIPT
                 ...fërdert op eng villsäiteg Manéier de Museksunterrecht an de Lëtzebuerger Schoulen.
                 ...bitt Materialien, Atelieren an Hëllefstellung am Beräich Musek an der Schoul.

mimamu riicht sech primär un d’Grondschoulen, woubäi awer och Maison Relaisen, Kompetenzzentren an aner schoulesch Strukturen heivu profitéiere kënnen.

Nieft enger grousser Datebank mat museksdidakteschem Material bidde mir och eng Rei un Offerten mat Atelieren an der Klass.
D’Konzept vu mimamu soll Méiglechkeeten a Chancë bidden, datt intresséiert Enseignanten alleng, oder an der direkter Zesummenaarbecht mat der mimamu-Ekipp, innovativ Projeten an Aktivitéiten am Beräich vun der musikalescher Bildung ëmsetze kënnen.

Wie mécht mimamu ?

Eis Ekipp besteet aus Enseignanten, Musekspädagogen an enger Danzpädagogin. Fotoe vun de Memeren aus eiser Ekipp gesäis du hei drënner. 
Och Du kanns eis Deng Iddien an Däi Museksmaterial matdeelen, a mir deelen et mat der interesséierte Schoulcommunautéit.

Fir ween ass mimamu ?

• Fir all Enseignanten (an anert schoulecht Personal), mat, a virun allem OUNI musikalesch Virkenntnisser.
• Fir all Enseignanten, déi op der Sich sinn no neiem Museksmaterial, no flotten Iddie fir innovativ Projeten, oder awer gären op fachlechen Knowhow zréckgräife wëllen.¨
  
  
• Am Kannerberäich fannen awer och d'Schülerinnen a Schüler an hir Elteren eng Auswiel u Lidder an musekaleschen Aktivitéite fir doheem ze maachen. 

Wat bitt mimamu ?

Op mimamu.lu fannt dir:

• Bekanntes an Onbekanntes, wéi z. B.: selwer ausgeschaffte a komponéiert Museksmaterial wéi Lidder, Léierlidder, Integratiounslidder, Rhythmik, Instrumentespill, Spiller/Beweegungspausen, Boomwhackermaterial, Bodypercussion…
• didaktescht Material wéi z. B.: Playbacks, Videoen, Nouten, Partituren, Aarbechtsblieder,
• eng Sammlung vu Projeten uechtert d’Land, fir op déi ganz divers Aktivitéite vu mimamu hinzeweisen.
• e Formulaire fir mat der mimamu-Equipe a Kontakt ze trieden an e gemeinsame Projet ze diskutéieren.

Wat ass mimamu net ?

mimamu ass kee ganzheetleche Musekscours fir d’Klass.
mimamu ass och keen integrale Programm, dee vun hanne bis vir soll duerchgeschafft ginn.
D’Equipe vu mimamu ass net do fir reegelméisseg e Musekscours an d’Klass halen ze kommen, mä ënnerstëtzt den Enseignant op Nofro gär mat fachlecher Kompetenz.